Overordna mål og satsingar

Dei overordna måla til Giske kommune blir gitt i kommuneplanens samfunnsdel. Det vert arbeidd etter Samfunnsplanen for åra 2014-26. Den legg til grunn at Giske skal vere ei samspelkommune. I samspelkommunen ligg at eige ansvar, frivillig innsats og profesjonelle tenester spelar på lag på nye og kreative måtar. Dette er viktig i dag og i framtida, og særleg når ein ser korleis demografien i kommunen vil utvikle seg i same periode.

Satsingsområda som er valt for perioden er følgande:

• Vere ein god plass å bu - der alle vil bu
• Ha gode levekår
• Vere ein god næringskommune
• Ha eit rikt kulturliv

Basert på satsingsområda i samfunnsplanen har kommunen i 2022 arbeidd med følgande hovedområde:

• Sikre god økonomisk styring og kontroll, og endre tenestetilbodet i tråd med samfunnsutviklinga. Giske kom ut av ROBEK i april 2022. Skal kommunen få ein berekraftig økonomi må den fortsette med endring og tiltak for å ta ned drifta. Omstillingsarbeidet som er set i gang i pleie og omsorgstenestene er ein kritisk suksessfaktor for å oppnå ei berekraftig økonomisk utvikling og møte framtidas utfordringar med vekst i helse og omsorgstenestene.
• Omstillingsprogrammet «Tenesteutvikling gjennom digitalisering og bruk av ny teknologi»: fokus i 2022 har vore å ta i bruk eksisterande verktøy og arbeide med arbeidsprosessar knytt til dette. Nettbaserte løysingar for intern kommunikasjon og informasjon må vidareutviklast, overgang til digitale timelister, digital besøksregistrering i bygga, og ikkje minst forbetra digital søknadsprosess knytt til byggesak.
• samhandle slik at det blir levert tenester til flest mogleg i samspel med innbyggarane, dei frivillige og dei tilsette.
• samhandle med næringslivet, og legge til rette for vidare vekst, utvikling og nye næringar.
• samarbeide med nabokommunane våre, særleg Ålesund kommune og Sula kommune for å bygge ein sterk region.
• ha fokus på og vere pådrivar til vidareutvikling i bruk av digitale verktøy for å møte den veksten som kjem blant anna knytt til eldrebølgja.
• arbeide for FN’s berekraftsmål for å ivareta miljøet, bruke mindre, gjenbruke, og ha eit spesielt fokus på havet og søppel i havet.
• ferdigstille marine grunnkart saman med nabokommunane og ta det i bruk i hamneutvikling og i planlegging av sjøområda.
• endre organisering og struktur ut ifrå samfunnsutviklinga.
• bidra til felles utvikling av Ålesundsregionen gjennom viktige samspelsprosjekt som Smart-by, Plan for klima, areal og transport (PAKT) og handlingsplan for førebygging av vold og seksuelle overgrep.