Barnehage og styrka tilbod (førskuletilbod)

Teneste 2110 Barnehage

Giske har 6 private og 2 kommunale barnehagar. 99,5 % av barna i barnehage har full plass.

Talet på barnehagebarn er auka frå 555 i 2021, til 563 i 2022. Talet på barn har auka i private barnehagar og minska i dei kommunale. Det er har blitt plass til fleire småbarn i barnehagane. Private barnehagar har 121,2 årsverk og dei to kommunale barnehagane har 31,4 årsverk.

Til saman utgjorde tilsette i barnehagane i Giske kommune 152,71 årsverk.

Det har totalt sett vore ein jamn nedgang i talet på dispensasjonar frå utdanningskravet, men rekruttering av barnehagelærarar er framleis svært utfordrande i og med at ein av 5 pedagogar manglar godkjend utdanning. Ved oppstart av nytt barnehageår i august 2022 arbeidde 20 % av pedagogane på dispensasjon i barnehagane. Giske kommune har rettleiingsgrupper for pedagogar på dispensasjon og tek del i kurs i regi av Sunnmøre regionråd. Giske kommune fekk ikkje til å tilby rettleiing for nyutdanna barnehagelærarar i 2022. Frå 2025 skal 50% av dei tilsette i barnehagane vere barnehagelærarar, noko som fordrar auka bemanning og gode strategiar for rekruttering.

Utviklingsarbeidet i barnehagane har vore konsentrert om inkluderende praksis, basert på Mitchell sine 10 faktorar. Det er oppretta inkluderingsteam i alle barnehagar. Spespedteam og helsestasjon har bidratt med tverrfagleg blikk inn i analysearbeidet i inkluderingsteama. PPT har ikkje hatt disponibelt personell til å ta del i inkluderingsarbeidet i barnehagane.

Alle barnehagar har fått tilbod om å vere med på regional kompetanseutvikling. To av barnehagane har teke del i dette arbeidet. Det blir peika på at låg grunnbemanning kombinert med høgt sjukefråvær gjer det vanskeleg å frigjere personell til til utviklingsarbeid og kompetanseheving.

Teneste 2111 Styrka tilbod til førskulebarn

Styrka tilbod til førskulebarn omfattar både spesialpedagogiske tiltak og tilrettelegging for barn med særlege behov. Spesialpedagogane i førskule er tilsett i kommunen, med 5,1 årsverk i 2022. Av dette går 0,3 årsverk til arbeid med minoritetsspråklege barn, finansiert av øyremerka tilskot. Det er avsett 0,4 årsverk til teamleiar, som har ansvaret for å fordele arbeidsoppgåvene for spesialpedagogane og følgje opp arbeidet med tilbodet i barnehagane. Spesialpedagogane bidrar i utviklingsarbeid som BU modellen, TALK (nettverk for barn med autisme) og nettverk for barn med forseinka utvikling. Det er fagleg vurdert som tenleg å knytte spesialpedagogane tettare opp mot barnehagane for at deira kompetanse kan bidra inn i å forbetre kvaliteten i det allmennpedagogiske, utvikle betre samanheng mellom det spesialpedagogiske og det allmennpedagogiske og slik styrke den inkluderande praksisen.

I vedtak om spesialpedagogisk hjelp blir det, etter sakkunnig vurdering, sett inn spesialpedagog. I tråd med enkeltvedtak og vedtak om tilrettelegging for barn med nedsett funksjonsevne styrker barnehagen si bemanning. Dei private barnehagane får refusjon frå kommunen når dei etter vedtak tilsett ressursassistent.