Overordna mål og satsingar

Giske kommune skal halde ein høg etisk standard i samsvar med etisk reglement. Reglementet vert årleg gått gjennom og drøfta i kommunestyret og med dei tilsette.

Giske kommune har eit overordna kvalitet- og internkontrollsystem og arbeider med kontinuerleg forbetring på dagsorden. I 2020 har vi blant anna hatt fokus på GDPR.

Dei overordna måla til Giske kommune blir gitt i kommuneplanens samfunnsdel. Vi arbeider etter Samfunnsplanen for åra 2014-26. Den legg til grunn at Giske skal vere ei samspelkommune. I samspelkommunen legg ein at eige ansvar, frivillig innsats og profesjonelle tenester spelar på lag på nye og kreative måtar. Dette er viktig i dag og i framtida, og særlig når vi ser korleis demografien i kommunen vil utvikle seg i same periode.

Satsingsområda som er valt for perioden er følgande:

• Vere ein god plass å bu - der alle vil bu
• Ha gode levekår
• Vere ein god næringskommune
• Ha eit rikt kulturliv

Basert på satsingsområda i samfunnsplanen har kommunen i 2020 arbeidd med følgande hovedområde:

• "Drift i balanse": For å kome ut av ROBEK må vi endre oss. I 2020 har fokuset vore å arbeide med tiltak for å ta ned drifta. Arbeidet må vidaraførast i 2021, men vi ser ved utgangen av året at tiltaka verkar og at drifta er på god veg til balanse.
• Omstillingsprogrammet «Tenesteutvikling gjennom digitalisering og bruk av ny teknologi»: fokus i 2020 har vore å ta i bruk eksisterande verktøy og arbeide med arbeidsprosessane knytt til dette. Blant anna skal nettbaserte løysingar for intern kommunikasjon og informasjon vidareutviklast, overgang til digitale timelister, digital innregistrering i bygga våre, og ikkje minst forbetra digital søknadsprosess knytt til byggesak.
• Prosjekt "Giske 2020": handla om å sette fart på Giske som ein god nabo til Nye Ålesund. Det har vore lagt ned mykje arbeid i forhold til avklaring av kva tenester vi skal produsere sjølv, og kva vi skal samhandle med andre om. Det har blant anna blitt arbeidd med nye samhandlingsavtalar med Nye Ålesund.
• Smartby-satsing: Giske er saman med Ålesund og Sula med i Smartby-satsinga. Dette gir oss unike mulegheiter til å utvikle framtidsretta smarte tenester og enklare innbyggardialog. Ein del av dette er deltaking i framtidslabben ved NMK (Norsk maritimt kompetansesenter).
• Sjølvhjelpte innbyggarar: Gjere innbyggarane sjølvhjelpte så langt det er mogleg og ha realistiske forventningar til kva kommunen kan levere av tenester. Gjennom dialog, medverknad og engasjement skal ein saman definere grensene for kva det offentlege kan tilby og kva den enkelte må ta ansvar for gjennom tilrettelegging ved livsendringar. Frivillige lag og organisasjonar har ei naturleg rolle i dette arbeidet.
• Innbyggarmedverknad skaI ha fokus ut over det som følgjer av lov og forskrift. Samspel med innbyggarane skal ha høg prioritet. Tankegangen bak metoden «samskaping» skal nyttast som modell for arbeidet.
• Framover vil fokuset også vere å ta berekraftsmåla inn "under huda" i organisasjonen.