8 Miljø og kultur

Eininga Miljø og kultur dekkjer tenester som vist på rekneskapsoversikta ovanfor. Årsmeldinga oppsummerer dei viktigaste prioriteringane i 2020 utan å ta for seg kvar enkelt teneste, med vekt på brukarretta tenester utan å kommentere tenester der ein fordelar midlar til lag, organisasjonar og nærmiljø.

Eininga har vore utan einingsleiar sidan februar. Frå 2021 blir dei ulike tenesteområda med unntak av kulturskulen overførte til den nyoppretta eininga Kultur, service og næring.

Kulturskulen vart i 2020 overført frå ramme 8 til ramme 5 Oppvekst. Budsjettet vart redusert og midlar overført til oppvekst. Frå 2021 blir også budsjettet overført til ramme 5.

Sjølv om det viste seg vanskeleg å få til den vedtekne budsjettreduksjonen for kulturskulen, gjekk eininga med eit mindreforbruk på 624.000 kroner. Ein viktig grunn er at stillinga som einingsleiar stod vakant sidan februar, stillinga som kulturkonsulent stod vakant sidan august. I tillegg må det nemnast at Frivilligsentralen har lykkast med å få inn store tilskot både frå private og offentlege instansar.

Ungdommens kulturmønstring 2020 vart gjennomført i februar med Valderøy skulekorps som teknisk arrangør som så mange år før. Men fylkesmønstringa vart gjennomført digitalt. Dei ulike innslaga vart filma i Ålesund og presentert på UKM sine sider. Flinke ungdomar frå Giske gjorde ein flott figur på fylkesmønstringa.

Våre to MOT-coachar er ein viktig del av det forebyggande arbeidet som skjer inn mot ungdomsgruppa. MOT gjennomfører 12 besøk til ungdommane i løpet av dei tre åra dei går på ungdomsskulen, og er også på besøk i 7. klassene. MOT har to 20 % stillingar.