Økonomiske hovudtal

Kommunen sine driftsinntekter var 817,6 mill. kr mot justert budsjett på 765,9 mill.kr. Dette er ein auke på 51,6 mill.kr i høve det opprinnelige budsjettet. Av dette kjem 56,3 mill. kr av større inntekter frå overføringar med krav til motyting (statlege tilskott, sjukepengerefusjon mm.) som har motpostar i driftsutgiftene.

Kommunen sine driftsutgifter var 797,5 mill.kr mot justert budsjett på 750 mill. kr. Auken på 47,5 mill. kr skriv seg i stor grad frå auke i lønsutgifter med 28,9 mill.kr. Auka lønsutgifter må ein sjå i samanheng med sjukelønsrefusjon, som er ein del av kommunen sine driftsinntekter. Tilskott som ikkje er brukte i året vert overført til bundne fond.

Kjøp av varer og tenester blei 252,2 mill. kr mot justert budsjett på 229,2 mill.kr.

Overføring og tilskott til andre vart 29,1 mill.kr og var budsjettert med 27,3 mill. kr.

Kommunen sine netto finansutgifter vart kr 56,6 mill. kr og var budsjettert med 71,8 mill.kr. Det vart ein gevinst på finansane på 14 mill.kr mot budsjettert gevinst på 6 mill.kr. Renteinntekter vart 8,1 mill.kr, og 4,9 mill.kr over budsjett. Auken kjem av auka rentesats og større innskot enn forventa b.la. som følge av at premiefond har vorte brukt til å dekke pensjonskostnadane. Renteutgiftene vart om lag som budsjettert.

Endeleg utrekning av minsteavdrag viser at Giske kommune har budsjettert med 1,9 mill.kr for mykje i avdrag.

Giske kommune hadde i 2023 eit netto driftsresultat på 3 mill. kr. Til samanlikning var netto driftsresultat i 2022 på 32,5 mill. kr, dvs. ein nedgang av netto driftsresultat på 29,8 mill.kr.

Brutto driftsresultat viser resultat av ordinær verksemd inkludert avskrivingar. Resultatet uttrykker kommunen sin evne til å betene gjeld, finansiere investeringar og setje av midlar til fond. Brutto driftsresultat i andel av brutto driftsinntekter er på 2,45 prosent i 2023 mot 7,1 prosent i 2022.

Den viktigaste indikatoren på handlingsrommet for ei kommune er netto driftsresultat. Netto driftsresultat viser resultat etter at renter, avdrag og utlån er belasta rekneskapen og er den delen av overskotet som er disponibelt som egenkapital til investeringar, avsetningar og dekning av tidlegare års underskot.

Teknisk berekningsutval anbefaler at netto driftsresultat er 1,75%. Giske kommune har som mål eit driftsresultat på minst 3 - 5% for å bygge opp disposisjonsfondet slik at kommunen kan få ein berekraftig økonomi. Giske kommune har no hatt nokre gode år der nivået har vore over det anbefalte nivået og har klart å styrke disposisjonsfondet som no er 5,8 prosent av driftsinntektene. Giske sitt mål er 5 - 10% av driftsinntektene. På grunn av høg lånegjeld bør nivået vere nærare 10% for at kommunen skal ha ein robust økonomi. Det er derfor behov for å styrke disposisjonsfondet ytterlegare i åra framover.

Dersom ein trekker ut årets inntektsførte premieavvik m/arbeidsgiveravgift på kr 3 738 957, hadde Giske kommune eit korrigert netto driftsresultat på - kr 701 000.

Giske har mindre i frie inntekter i kroner per innbyggar enn gjennomsnittet i kostragruppe 1, men kjem betre ut både i brutto driftsresultat i prosent av brutto driftsinntekter og netto driftsresultat i prosent av brutto driftsinntekter enn kostragruppe 1.