6 Barn, familie og helse

Rekneskap for ramme 6, Barn, familie og helse, viser eit meirforbruk med kr 2 173 000 ut frå endra budsjett. Ramme 6 fekk tilført kr 2,4 mill gjennom budsjettendring ila året, dette grunna auke i tal flyktningar frå 15 til 43.

Årsak til meirforbruk er knytt til institusjonsplassering barnevern kr 1,6 mill, høgare utgifter til mottak av flyktningar enn budsjettert og bruk av vikarlege.

Oppvekstreforma/barnevernsreforma tredde i kraft frå 1.1.2022. Kommunen har fått ansvar for institusjon og fosterheimsarbeid som barneverntenesta må handtere, ut over det ligg reforma til heile organisasjonen å følgje opp. Det krev mellom anna tett samarbeid mellom ei rekke tenester. Mange av oppgåvene vert løyst gjennom satsinga Betre tverrfagleg samhandling (BTS).

Kommunestatestikken viser at 28% av innbyggjarane i Giske kommune er mellom 0-20 år. Det er framleis nasjonal satsing på helsestasjon, skulehelseteneste og jordmorteneste. Desse tenestene søkjer vi tilskot til frå stat for å styrkje bemanninga. Betre tverrfagleg samarbeid (BTS) er eit overordna satsingsområde i Giske kommune. Prosjektet vert finansiert gjennom tilskot frå Bufdir. Arbeidet er forankra både politisk og administrativt. Arbeidet skal treffe fleire lovkrav og reformer som er retta til kommunen å handtere. Kommunen vil framover ha stort fokus på tidleg innsats og førebyggande arbeid til barn og unge ein er bekymra for.

Giske kommune deltek i interkommunalt samarbeid og kjøper tenester hjå andre kommunar knytt til legevakt natt, barnevernvakt, krisesenter og overgrepsmottak.

Kommunen har fått tilført nye og fleire oppgåver dei siste åra. Det følgjer ikkje alltid med økonomiske midlar til å gjennomføre oppgåvene, kommunen må handtere dette med eksisterande ressursar. Tenestene gir tilbakemelding om stor arbeidsmengd og slitasje over tid.

Fastlegeordninga, som er krevjande i mange kommunar i landet, har vore stabil i Giske kommune i 2023. Legesenteret hadde ein kort periode innleigd vikarlege.

Driftstiltak 2023:

• Halde stilling vakant 10 mnd, psykolog.
• Oppretting 20 % barnekoordinator
• Auke i utgifter til fastlegeordninga
• Flyktning, Ukraina. Fellestiltak med ramme 4 og 5.
• Samhandling for rette tenester. Fellestiltak med ramme 5, 4 og 7.

Tiltaka vart gjennomført, tiltak om barnekoordinator som er under arbeid.

Dei største utfordringane for eininga i 2023:

• Fleire stillingar i tenestene har stått vakante i store deler av året for å nå målet om innsparing, Dette har ført til stor belastning på tilsette og leiarar. Særleg i tenesta PPT.
• Rekruttere og behalde fagpersonell.
• Mottak, busetting av nye flyktningar.
• Sjukefråvær, 13% i 2023. Fører til auka slitasje i tenestene.
• Styrke den tverrfaglege og koordinerte innsatsen til utsette barn og unge.

Berekraftsmål 3: God helse og livskvalitet. Eininga har sett i verk ulike rutiner og retningslinjer og følgt nasjonale krav og føringar. Giske kommune har god dekking av allmenne helsetenester. Kommunen samarbeider med Helseføretaket, politiet og kommunane rundt for å møte utfordringar på best måte. Giske kommune har eit godt samarbeid med Giske kommunale legesenter for å yte best mogleg samanhengande tenester.

Berekraftsmål 17: Samarbeid for å nå måla. Prosjekt "Betre tverrfagleg samhandling" er viktig arbeid mellom oppvekst, helse og omsorg. Elles samarbeider tenestene både internt i eininga og med tenester i andre sektorar.

Kostratal vert presentert under tenesteområda.