Organisasjon

I alt 615 personar var tilsett i Giske kommune ved utgangen av 2023. Av desse er 495 kvinner (411 årsverk) og 120 menn (106 årsverk). Dei 615 tilsette er fordelt på 517 årsverk.

Giske kommune hadde også i 2023 eit godt samarbeid med Sunnmøre kommunale opplæringskontor. Det har vore 6 lærlingar fordelt på faga helsefagarbeidar, barne- og ungdomsarbeidar og institusjonskokk. Det var er eit ønskje å auke talet på lærlingar, men på grunn av svært stram økonomi er det ikkje gjort.

Giske kommune får kvart år fråværsopplysningar frå Statistisk sentralbyrå. Her får vi ikkje informasjon om fråværet for heile året, og legemeldt fråvær for 3. kvartal 2022 var 6,6 % , mot 6,7 % i fjor.

Mest mogleg heile stillingar er viktig for kontinuitet, stabilitet og samla kompetanse. Det betyr mykje for arbeidsmiljø, likestilling og kvaliteten på tenestetilbodet.

Talet på heiltidstilsette har auka siste åra, og det er bra! Det har imidlertid vore ein nedgong i heiltidstilsettingar samanlikna med 2022. I 2023 arbeidde 51 % av alle tilsette i Giske kommune heiltid. I helse/pleie/omsorg var det 32 % som arbeidde heiltid, mot 33 % i 2022. I undervisning var andelen 65 % mot 67 % i 2022. I barnehage var det 46 % heiltidstilsette, mot 52 % i i 2022.

73 % av alle tilsette arbeider i 75 % stilling, eller meir. I 2022 var andelen 75 %.

Gjennomsnittleg stillingsbrøk i Giske kommune var 81 % mot 82 % i 2022 og 79% i 2021.

Kjønnsbalansen i Giske kommune er 80 % kvinner og 20 % menn. Fordeling mellom kvinner og menn i oppvekst er 83 % kvinner og 17 % menn, i helse/pleie /omsorg er fordelinga 84 % kvinner og 16 % menn. Lønsutvikling kvinner og menn kjem fram av tabellen under.

Av 21 leiarar i kommunedirektøren sitt leiarforum var 4 menn og 17 kvinner. Kvinnene si snittløn var kr 914 220,- og mennene si snittløn var kr 896 712,-. Kommunedirektør og 3 kommunalsjefar er ikkje med her.

Omsyn til likestillingslovgivinga sine krav er nedfelt i arbeidsgivarpolitiske dokument som lønspolitisk plan, prosedyre for rekruttering, handtering av mobbing og trakassering o.l. og tydeleg belyst i all leiaropplæring. Det underrepresenterte kjønn vert oppfordra til å søkje ledige stillingar, - Giske kommune er som alle andre kommuner sterkt kvinnedominert. Tilrettelegging for seniorar og tilsette med funksjonsnedsettelse er tema i medarbeidar- og oppfølgingssamtaler. I helse og omsorgstenesta er uønska deltid kartlagt, og resultatet har vore eit nyttig utgangspunkt i arbeidet med å redusere uønska deltid.

Giske kommune har som dei alle fleste kommuner store utfordringar når det gjeld å rekruttere helsepersonell, dette gjeld i særleg grad sjukepleiarar og vernepleiarar, men ein ser også auka utfordring i å rekruttere nok fagarbeidarar. Det er også vanskeleg å få tilsett tilstrekkeleg kvalifiserte personar i ledige undervisningsstillingar, - det er for mange ufaglærte i oppvekstsektoren. I teknisk sektor er heller ikkje søkjarlistene lange, men der er kvalifiserte søkjarar.

Innan oppvekstsektoren er det ikkje innført ekstra rekrutteringstiltak i særleg grad. For pleie og omsorgstenestene er fleire rektrutteringstiltak sett i verk for å betre på situasjonen. Det er nytta stipendordning for sjukepleiarar og vernepleiarar, det er etablert dagstillingar innan sjukepleie, og det er gjort ein god jobb i å endre arbeidsfordelinga til sjukepleiarar, fagarbeidarar og assistentar slik at sjukepleiarar får brukt kompetansen sin hovudsakleg til reine sjukepleiefaglege oppgåver. Det er vidare innført ordning med kjøkkenvert, og alle omsorgsdistrikt har, i samarbeid med NAV, personar på arbeidspraksis. Løn godt over tariff er også brukt som eit rekrutteringstiltak.